Administrazioa zugandik hurbil

Zerbitzu berri bat  biztanle gutxiko udalerrietako herritarrei Estatuko Administrazio Orokorrarekin tramiteak egiten laguntzeko. 

Espainiako Gobernuak “Administrazioa zugandik hurbil” ekimena sustatu du, biztanle gutxiko udalerrietan bizi diren herritarrei Estatuko Administrazio Orokorraren (EAO) tramiteak eta prestazioak kudeatzen laguntzeko.

Hemendik aurrera, Estatuko Administrazio Orokorreko langile publikoen unitate bat udalerri txikienetara hurbilduko da herriarrei ematen zaizkien zerbitzu publikoak hurbildu eta beren kalitatea hobetzeko.

Zertan datza zerbitzu berri hau?

Lurralde Politikako Ministerioak Espainia osoan 400 enplegatu publiko baino gehiago prestatu ditu, landa-eremuetako herritarrei administrazio digitala hurbiltzeko. Herritarrei arreta pertsonala emateko, administrazio digitalaren abantailak aprobetxatuz. 

Espainiako Gobernuaren Ordezkaritza, Ordezkariordetza eta Uharteetako Zuzendaritzetako enplegatu publikoak herrietara joango dira eta honako zerbitzu hauek eskainiko dituzte:

» Informazio-saioak egitea.

» Estatuko Administrazio Orokorraren izapideak egiten laguntzea eta orientatzea.

» Nahi duten herritarrei sinatzeko baliabide digitalak ematea, hala nola ziurtagiri elektronikoa edo Cl@ve sistema. Horien bidez, Herritarren Karpeta bezelako aplikazioetarako sarbidea eta Estatuko Administrazio Orokorrarekin mota guztietako izapideak egiteko aukera izango dute.

Non aplikatuko da?

Lehenengo fasean, proiektu hau 500 eta 8.000 biztanle arteko udalerrietan aplikatuko da, guztira, 3.200 udalerri baino gehiago Espainia osoan.

Sakabanatze demografiko handiena duten probintzietan, lehen fasean udalerri txikienetara ere zabalduko da.

Gobernua hitzarmen bat lantzen ari da Espainiako Udalerrien eta Probintzien Federazioarekin (FEMP), interesa duten udalek eta toki-erakundeek ekimenarekin bat egin dezaten.

Nori dago zuzenduta?

Zerbitzu berriak 7,5 milioi pertsonari zuzenduta dago, eta horietatik ia % 30 60 urtetik gorakoak dira.

Gobernuak badaki pertsona asko baztertuta sentitzen direla teknologia berriak gero eta gehiago erabiltzen direlako administrazioekin izapideak egiteko.

Horretarako sortu zen "Administrazioa zugandik hurbil": eten hori ezabatzeko eta pertsona guztiei, edozein lekutan bizi direla ere, Estatuko Administrazioarekin izapide digitalak egiten laguntzeko.

Nola eskatu zerbitzu berria?

Zerbitzu hau erabili nahi duten udalek dagokien Ordezkaritzaren, Ordezkariordetzaren edo Uharteetako Zuzendaritzaren bitartez eska dezakete. Ondoren, informazio saioak egingo dituen unitatea zein egunetan  eta zein ordutan joango den zehaztuko da.

Udalerrikoa  bazara, hurbildu zaitez zure Udaletxera eta galdetu “Administrazioa zugandik hurbil” unitatea noiz hurbilduko den zure herrira.

Zeintzuk dira helburuak?

Gobernuaren helburua herritarrei bizitza erraztea da, Estatuko Administrazioa beren hirira, beren herrira hurbilduz. Hau nahi dugu:

» Gizarte eta lurralde kohesioa indartzea.

» Eten digitalari aurre egitea.

» Aukera-berdintasuna bermatzea.

Gobernuak estatu-eredu deszentralizatu baten aldeko konpromisoa hartu du, eta politika eta kultura aldetik askotarikoa den Espainia bat babesteko modurik onena Estatuko Administrazioak lurraldean duen presentzia indartzea da.

Estatuko Administrazioa hurbil sentitzea modu bat da gure herria kohesionatzeko eta aukerak partekatzeko. Azken finean, herrialde indartsuago eta adimentsuago bat egiteko.

Sinatzeko Baliabide digitalak

Zer da ziurtagiri digitala?

Pertsona Fisikoaren FNMT ziurtagiri digitala, FNMT-RCMk ematen duen ziurtagiri elektronikoa da eta horrek, sinatzailea sinadura egiaztatzeko datuekin lotzen du eta bere nortasuna sendesten du.

Ziurtagiri hau, Herritarraren edo Erabiltzailearen Ziurtagiri izenaz ere ezagutzen dena, eskatzailearen identifikazio datuak dituen dokumentu digitala da eta, bere burua interneten identifikatzeko eta informazioa beste pertsona edo erakunde batzuekin  trukatzeko aukera emango dio, informazio hori berak eta bere solaskideak bakarrik izango dutela bermatuz.

Nork lor dezake persona fisikoaren ziurtagiri digitala?

Espainiako edo atzerriko edozein herritarrek, adinez nagusi edo adingabe emantzipatua denak eta  NANa edo AIZa duenak, ziurtagiri digitala doan eskatu eta lortu ahalko du, sinatzeko eta  Interneten bere nortasuna modu seguruan egiaztatzeko.

Zertarako balio du?

Pertsona Fisikoaren Ziurtagiri Digitalaren bidez, Interneten izapideak modu seguruan egin ahalko dituzu Administrazio Publikoarekin eta Erakunde Pribatuekin, adibidez:

• Zergen aurkezpena eta likidazioa

• Errekurtsoak eta erreklamazioak aurkeztea

• Biztanleriaren eta etxebizitzen erroldako datuak betetzea

• Udal-errolda kontsultatzea eta izena ematea.

• Zirkulazio-isunak kontsultatzea

• Dirulaguntzak eskatzeko kontsultak eta izapideak

• Hauteslekuak esleitzeko kontsulta

• Jakinarazitako jarduerak

• Dokumentuak eta inprimaki ofizialak elektronikoki sinatzea.  

Pertsona Fisikoaren FNMT Ziurtagiriari esker, beharrezkoak ez diren joan-etorriak eta itxaronaldiak ahaztuko  dituzu.

Zer da Cl@ve Iraunkorra sistema? 

Administrazioaren zerbitzu elektronikoetara sarritan jo behar duten pertsonentzat diseinatutako Autentifikazio sistema bat da. Honako hauen erabileran  oinarritzen da: Erabiltzaile-kode bat, NANa edo AIZa, eta aktibazio-prozesuan jarriko duzun  eta zuk bakarrik  jakin beharko duzun pasahitza. Aktibatze prozesuan sartzeko, beharrezkoa da aldez aurretik sisteman erregistratuta egotea.

Segurtasun maila handia behar duten administrazio elektronikoko zerbitzuetarako, sistemak autentifikazioa indartuko du, erabilera bakarreko zenbaki-kode bat sartzeko eskatuz (One Time Password, OTP), aurretik zure telefono mugikorrera SMSz bidaliko zaizuna.